Қазақстанда жыл басынан бері жазатайым оқиғалардың салдарынан 23 бала көз жұмды

Балалар омбудсмені Динара Зәкиева қазақстандық ата-аналарға үндеу жасап, балаларын қараусыз қалдырмауға шақырды, деп хабарлайды Azattyq Rýhy.

«Күн сайын елімізде жарақат, асфиксия, биіктен құлау, құдықтарға, терезелерден құлап кету, суға бату, улану, өрт салдарынан 1-2 бала қайтыс болады. Көп жағдайда бұл балалардың қараусыз қалуынан және қауіпсіздігін қамтамасыз етпеуінен болады. Ересектердің қарауынсыз қалған үш айда 23 бала қаза тауып, 109 бала жазатайым оқиғалардан зардап шекті», - деді ол.

Сондай-ақ омбудсмен Цифрлық даму министрлігімен, ұялы байланыс операторларымен және Төтенше жағдайлар министрлігімен бірлесе отырып, барлық ұялы байланыс абонентіне балалардың қауіпсіздігін қамтамасыз ету шараларын еске салатын хабарлама жіберілгенін айтты. Еске салғыш хабарлама белгілі бір уақыт аралығында жіберіледі.

Омбудсмен бізге қауіпсіздік ережелерін еске салды:

• Балаларды назардан тыс, жалғыз қалдырмаңыз, оның ішінде – су қоймаларының жанында, терезелердің қасында, көлікте құлыптаулы немесе жол бойында. Терезелерге қауіпсіздік құлыптарын орнатыңыз.
• Балалардың өмірі мен денсаулығына қауіп төндіретін жағдайлар туралы 112, 102, 111 телефондарына хабарлаңыз.
• Баланың қауіпсіздігі – үлкендердің негізгі міндеті.