Ақтөбеде үлескерлерден 421 млн теңге жинап алып, тұрғын үй салмаған компания басшысы істі болды

Ақтөбеде «Жилище» құрылыс компаниясының төрағасы үлескерлерден 421 млн теңге жинап алып, уәде етілген тұрғын үйді салмаған. Оған қатысты қылмыстық іс 2 сәуірде сотқа жолданды, деп хабарлайды Azattyq Rýhy.

Облыстық прокуратураның мәліметінше, зардап шеккен 75 үлескер тұрғын үй құрылысына 421 млн теңгеден астам қаражат салған. Алайда, компания Ақтөбе қаласында 2 үйді салмаған.

«Облыс аумағында жалпы 11 проблемалық үлескерлік құрылыс бар, олар бойынша 745 жәбірленуші, залал – 5,6 млрд теңге.

Өткен жылы 5 құрылыс компаниясының басшылары 8 нысан бойынша қылмыстық жауапқа тартылып, 6 жылға сотталды.

Прокуратурамен, азаматтық тәртіпте соттарға 2 талап-арыз жолданды, яғни 159 үлескердің мүддесі үшін, сатып алу шарттарын жарамсыз деп танып, үлескерлердің пайдасына 2 млрд теңге өндіру талап етілген. Одан басқа, 600 үлескердің мүддесі үшін тағы 6 талап-арыз жолданады», - делінген прокуратура хабарламасында.

Прокуратура органдары азаматтарды құрылысшылардан барлық рұқсат құжатын талап етуге шақырады, мысалы:

• уәкілетті оператордың кепілдігі;
• екінші деңгейлі банктің жобаға қатысуы;
• тұрғын үйдің құрылысының толық даярлығы.