Сүйіктісін соққыға жыққан Шәріп Серік қамауға алынды

Алматы қаласында Шәріп Серіктің экс-сүйіктісін соққыға жығуы бойынша іс қаралды, деп хабарлайды Azattyq Rýhy.

Қалалық соттың мәліметінше, актер серіктесі Әлия Бутеевамен жанжалдасып, мінез-құлық нормаларын бұза отырып, әдепсіз сөздер қолданған.

Сот талқылауы барысында актер өз кінәсін мойындап, іс материалдарында көрсетілген мән-жайларды растады.

«Құқық бұзушымен отбасы-тұрмыстық қатынастардағы адамдарға сыйламаушылық көрсетiлiп, былапыт сөйлеу, қорлап тиiсу, кемсiту, үй тұрмысындағы заттарды бүлдiру және олардың тыныштығын бұзатын, тұрғын үйде жасалған басқа да әрекеттер, егер бұл әрекеттерде қылмыстық жазаланатын іс-әрекет белгiлерi болмаса, ескерту жасауға не бес тәулікке әкiмшiлiк қамаққа алуға әкеп соғады.

Сот қаулысымен Шәріп Серік Қазақстан Республикасы ӘҚБтК-нің 73-бабының 1-бөлігімен кінәлі деп танылып, 5 тәулік мерзімге әкімшілік қамаққа алу түріндегі жаза тағайындалды. Сот қаулысы заңды күшіне енген жоқ», - делінген қалалық соттың хабарламасында.

Айта кетейік, осыған дейін Серік Шәріптің бұрынғы сүйіктісі Әлия Бутеева актердің өзін соққыға жыққаны туралы айтқан болатын. Сол сияқты актер ірі медиакомпанияның қара тізіміне енді.

Ал оның бұл әрекетіне қатысты актердің бұрынғы жұбайы, танымал рэпер Say Mo (аты-жөні – Мөлдір Есембек) пікір білдіріп, бірнеше жыл бұрын өзі де осындай жағдайға тап болғанын айтқан.

Өз кезегінде актер жасаған ісіне өкінетінін, заң аясында өзінің жазасын алуға дайын екенін айтқан болатын.