Павлодар облысында қараусыз жайылып жүрген мыңдаған бас малдың иесі жазаланды
Қараусыз жайылып жүрген мал жол-көлік оқиғаларына жиі себеп болып жатады
Павлодар облысында қараусыз жайылып жүрген 2352 бас малдың иесі жауапқа тартылды, деп хабарлайды Azattyq Rýhy.
Қараусыз жайылып жүрген мал жол-көлік оқиғаларына жиі себеп болып жатады. Мәселен, Павлодар облысының «Омбы-Майқапшағай» автожолында, Аққулы ауылының маңында Chevrolet cobalt автокөлігінің жүргізушісі құлынды басып кетті. Жол-көлік оқиғасы салдарынан жүргізуші жарақат алып, ауруханаға жүгінді.
Іздестіру іс-шаралары барысында Аққулы ауданының полиция қызметкерлері мамандандырылған тұраққа айдалатын иесіз табынды анықтады. Кейінірек соғылған жылқы мен табынның иесі де анықталды.
«Бастапқыда иесі апатқа ұшыраған жылқыны өзіне тиесілі емес деп бас тартты. Бірақ полицейлердің ұқыптылығының арқасында, табында құйрығы өрілген жылқыларды байқаған иесі көлік қағып кеткен құлынды да өзінікі екенін мойындады. Иесі жауапқа тартылды. Сондай-ақ, Chevrolet cobalt автокөлігінің жәбірленуші жүргізушісі залалды өтеу үшін азаматтық тәртіпте сотқа жүгіну құқығын өзіне қалдырады», - деп хабарлады Павлодар облысының Полиция департаменті.
Ведомство мәліметінше, мамандандырылған тұрақтарға 2352 иесіз мал орналастырылды, 127 иесі жауапкершілікке тартылды. Облыс аумағында иесіз малдың қатысуымен 2 ЖКО тіркелді.
