Астанада Наурыз мейрамына орай ерекше киіз үй орнатылды

Астанада Наурыз мейрамына арналған мерекелік шаралар аясында ЭКСПО алаңында ерекше киіз үй орнатылды. Бұл жоба «Таза Қазақстан» экологиялық акциясының бір бөлігі ретінде жүзеге асырылды, деп хабарлайды Azattyq Rýhy Астана әкімдігінің баспасөз қызметіне сілтеме жасап.

Экологиялық киіз үй өнер, технология және экологияны біріктіретін ерекше алаңға айналды. Оның ішіндегі басты ерекшеліктердің бірі – жасанды интеллект жасаған картиналар. Бұл суреттер 2050 жылы Қазақстан экологиясын қорғау шаралары қабылданбаса, қандай өзгерістер болуы мүмкін екенін көрсетеді.

Сонымен қатар киіз үй Ecomaf компаниясының қайта өңделген пластиктен жасалған орындықтары қойылған. Ал Like Komek орталығы мұнда мұқтаж жандарға арналған киім жинау пунктін ұйымдастырды.

Киіз үйде қоқысты бөлек жинауға арналған контейнер ерекше қызығушылық тудырды. Шараға қатысушылар пластик пен қағазды белсенді түрде жинап, өңдеуге тапсырды.

«Наурыз мерекесіне орай біз барлық қала тұрғындарын экологиялық киіз үйге шақырамыз. Мұнда экологиялық өмір салтын ұстанғысы келетіндер үшін тренингтер өткізіледі. Қатысушылар қоқысты дұрыс сұрыптау бойынша пайдалы ақпарат алады. Қалдықтарды бөлек жинау – қоршаған орта ластануын азайтудың негізгі қадамдарының бірі. Дегенмен, бұл жүйенің тиімділігі тек азаматтардың саналы әрекетіне ғана емес, қайта өңдеу инфрақұрылымының дамуына да байланысты», – деді экотренер Мариям Қасымова.

Киіз үй ішінде тағы бір ерекше нысан – «экологиялық бастамалар ағашы». Қала тұрғындары оған экологияны жақсарту бойынша ұсыныстарын қалдырды. Бұл ұсыныстар «Таза Қазақстан»бағдарламасы аясында қарастырылып, жүзеге асыру мүмкіндігі қарастырылатын болады.

«Біз осындай шаралар арқылы адамдардың экологиялық мәдениеті мен санасын дамытуды мақсат етеміз. Қала тазалығын сақтау – әрбір азаматтың міндеті. Сондықтан мұндай акцияларды ұйымдастырушылар мен қатысушыларға алғысымыз шексіз», – деді «Астана жастары»еріктілер қозғалысының мүшесі Давид Шәріпов.

Ең танымал акциялардың бірі – пластик бөтелкелер мен қаптамаларды экологиялық сыйлықтарға айырбастау. Қоқыс өткізген қатысушылар эко-сөмкелер, экостақандар мен ойыншықтар сияқты пайдалы сыйлықтарға ие болады.