Ақмола облысында кішкентай бала анасының көз алдында құдыққа құлап кетті

Ақмола облысында кішкентай бала қардың астында жасырылған ашық құдыққа түсіп кетті, деп хабарлайды Azattyq Rýhy 24.kz-ке сілтеме жасап.

Баланы қасында болған анасы бірден байқамаған, бірақ жолдан өтіп бара жатқан адамдар шұғыл әрекет етіп, көмекке келген. Олардың бірі құдыққа түсіп, баланы шығарып алған.

Ақмола облыстық полиция департаменті құдық қақпағы жол тазалау жұмыстары кезінде қозғалып кеткенін мәлімдеді. Қазіргі таңда салғырттыққа жол берген жауапты тұлғаларды анықтау бойынша тергеу жүргізіліп жатыр.

«Куәгерлердің көмегімен бала құдықтан аман-есен шығарылды. Қазіргі уақытта оның жағдайы тұрақты, үйінде дәрігерлер бақылауында» – деп хабарлады Ақмола облысы полиция департаментінің баспасөз қызметі.