Ақтауда бәз біреу полиция қызметкеріне тап берді (ВИДЕО)
Кейін шабуылдаушы ауруханаға жеткізілді
Ақтауда психикалық дертке шалдыққан ер адам полиция қызметкеріне қарай жүгіріп, оны қорқытпақ болды, деп хабарлайды Azattyq Rýhy Lada.kz сайтына сілтеме жасап.
Оқиғаның видеосы Instagram-дағы "cenzura_aktau" парақшасында жарияланды.
Кадрлардан ер адамның патрульдік көліктің жанында тұрған полиция қызметкеріне қарай жүгіргенін көруге болады. Ол тоқтап, шабуылға дайындалғандай қалыпқа енеді, бірақ тәртіп сақшысы сабырлы қалпынан таймады. Оқиғаның қалай аяқталғаны белгісіз.
Маңғыстау облыстық полиция департаментінің мәліметінше, видеоға түскен азамат психикалық аурумен ауырады және сол сәтте дертінің өршуі байқалған. Оқиға 18 ақпанда, Ақтаудың 14-шағын ауданындағы «Астана» сауда орталығы маңында болған.
«Азамат медициналық көмек алу үшін ауруханаға жеткізілді. Қазір ол дәрігерлердің бақылауында», – деп хабарлады полиция департаменті.
