«10 келіге дейін салмақ қостым»: «Елдос Колобок» маңызды отадан кейінгі жағдайы туралы айтты

Ол Instagram-дағы парақшасында оқырмандарының сұрақтарына жауап беріп, денсаулығындағы өзгерістер мен салмақ қосуының себебін түсіндірді, деп хабарлайды Azattyq Rýhy.

Желі қолданушыларының бірі әзілкештің артық салмақ жинағанын байқап, себебін сұраған.

«Оған себеп – ем қабылдау кезінде ішкен дәрі-дәрмектер мен екпелер. 28 күннің ішінде 10 келіге дейін қосыппын. Дәрігерлер ем барысында аздаған салмақ қосуым мүмкін екенін алдын ала ескерткен еді. Дәрілер тәбетімді ашып жіберді, тамаққа құмартып кеттім», – деп түсіндірді Елдос.

Сонымен қатар, әзілкеш қазіргі салмағына қатысты алаңдаушылық білдірмейтінін айтып, әзірге өзін еркін сезінгісі келетінін жеткізді.

«Қазір арықтауға аса ынтам жоқ, біраз уақыт рахаттанып жүре тұрайын», – деп әзілдеді ол.