Армения үкіметінің алдында бизнес өкілдері наразылық білдіріп жатыр

Армения үкіметінің ғимараты алдында азаматтар жиналып, қымбатшылық пен декларациялау жүйесінің енуіне қарсы наразылық білдіріп жатыр, деп хабарлайды Azattyq Rýhy.

Армения үкіметінің ғимараты алдында шағын және орта бизнес өкілдері наразылық акциясын өткізіп, салық жүктемесінің артуына байланысты өз наразылықтарын айтты. Дәлірек айтсақ, олар айналым салығының артуына, сондай-ақ кейбір кәсіпкерлердің айналым салығынан қосымша құн салығы (ҚҚС) мен табыс салығы режиміне ауысуына қарсы. Бұл өзгерістер олардың салықтық ауыртпалығын 8 есеге дейін арттырған.

Кәсіпкерлер сонымен қатар, жалпыға ортақ инвентаризация және декларациялау талаптарына да қарсылық білдірді. Себебі көптеген жағдайларда ірі кәсіпорындардан шот-фактура алу мүмкін емес. Бұл, өз кезегінде, міндетті декларациялау жағдайында бизнес қызметінің тоқтауына әкелуі мүмкін.

Наразылыққа «Мать Армения» қозғалысының өкілдері де қолдау көрсетті.

«Никол Пашинян жүргізіп отырған саясаттың салдарынан әлеуметтік наразылық артып келеді. Адамдар айналым салығының, мүлік салығының, қоғамдық көлік бағасының өсуіне, қоқыс жинау төлемдерінің көбеюіне және табыстарды жалпыға ортақ декларациялауға шағымдануда. Осы жылдың басынан бері шағын және орта бизнес өкілдері қиын жағдайға тап болды. Біз барлық кәсіпкерлерді наразылық акциясына бірігуді шақырамыз», - деді олар өз мәлімдемесінде.