«Таза бейсенбі»: акцияға қатысушылар жалғызбасты қарттардың ауласын тазалады (фото)

Мемлекет басшысы Қасым-Жомарт Тоқаевтың бастамасымен жүзеге асқан «Таза Қазақстан» жалпыұлттық бастамасы аясында «AMANAT» партиясының «Таза бейсенбі» акциясы еліміздің әр өңірінде тұрақты түрде ұйымдастырылуда. Бүгінде акцияға қатысушылар қоршаған ортаны қоқыстан тазартып қана қоймай, қоғамдық орындар мен жалғызбасты қарттардың үйлерін қалың қардан тазартуға көмектесіп жатыр, деп хабарлайды Azattyq Rýhy.

Солтүстік Қазақстан облысының Жамбыл ауданында партия белсенділері «Таза бейсенбі» акциясын ұйымдастырып, зейнеткерлерге көмек көрсетті. Еріктілер егде жастағы адамдардың аулаларын қардан тазартты.  Ұйымдастырушылардың мақсаты - қыс мезгілінде көмекке мұқтаж адамдарға көмектесу, қолдау білдіру. Яғни, ауласын қардан аршып, жүріп-тұруын жеңілдету.

«Біздің өңірде қыс қатал болады, қар тазалау әсіресе егде жастағы адамдар үшін оңай емес. Мұндай жағдайда біз оларды жалғыз қалдырмаймыз. «Таза бейсенбі» акциясы тек қар тазалау ғана емес. Бұл - егде жастағы адамдарға көңіл бөлу, қамқорлық жасау болып табылады», - деп атап өтті «AMANAT» партиясының Жамбыл аудандық филиалының атқарушы хатшысы Владимир Волков.

Ақмола облысы Ерейментау аудандық   филиалының ұйымдастыруымен «Таза бейсенбі» акциясы Ерейментау қаласында жалғасын тапты. Жалғыз басты қарттардың үйінің ауласын партияның аудандық филиалының «Жастар Рухы» жастар қанатының белсенділері қардан, күл-қоқыстан тазартты.

Тазалық жұмыстары Қостанай өңірінде де ұйымдастырылды. Игі іске қатысушылар Амангелді ауданында мемориал маңын қардан тазалап, экологиялық мәдениетті қалыптастыруға өз үлестерін қосты.

«Бүгінгі «Таза Бейсенбі» акциясында Батыр бабалар ескерткішінің  маңайын қардан тазалау жұмыстары жүргізілді. Бұл акция әр апта сайын өткізіледі. Осы орайда, барша тұрғындарды аталған акцияға белсене қатысуға шақырамыз», - деді «AMANAT» партиясының Амангелді аудандық филиалының төрағасы Марал Досымов.

Ұлытау облысында «Таза бейсенбі» акциясы аясында «ПИК ЮТАРИЯ LTD» ЖШС ұжымы кәсіпорын аумағын қардан және мұздан тазарту жұмыстарын жүргізді. Бұл шара еңбек ұжымының қоршаған ортаны таза ұстауға және қауіпсіз еңбек жағдайларын қамтамасыз етуге деген жауапкершілігін көрсетеді.

Ал жамбылдық белсенділер бұл жолы Жамбыл ауданындағы «Ардагерлер» аллеясының төңірегін қоқыстан тазартты. Сондай-ақ эко-акцияға қатысушы «Жастар Рухы» жастар қанатының белсенділері аудан орталығына күнделікті тазалық шараларын жүргізетін қоғамдық жұмысшыларға тәтті бәліш пен ыстық шай таратты.   

«Өткен жылдан бері әрбір бейсенбі күні «АMANAT» партиясының қолдауымен әрбір бөлінген аумаққа шығып, қоқыстарды тазалап жұмыс жасалып жатыр. Бұл бастама өте жақсы деп ойлаймын. Көрші тұратын тұрғындар бар, соларға да осы тазалық жөнінде түсіндірме жұмыстарын айтып жатырмыз», – дейді партия Жамбыл аудандық филиалының төрағасы Талап Әбдібеков.

Алматы қаласында акция аясында партиялық бақылау комиссиясының мүшелері, AMANAT партиясының Бостандық филиалының Саяси кеңес Бюросы, «Stamp service» ЖШС мердігерлік ұйымы, сондай-ақ Әл-Фараби атындағы Қазақ ұлттық университетінің магистранттары тазарту жұмыстарын жүргізді. Олар аудан тұрғындарына қамқорлық көрсете отырып, Достық саябағында балалар мен спорт алаңдарын қардан тазартуды ұйымдастырды. Осылайша, жастар қоғамдағы үлкендерге қамқорлық көрсету арқылы игі істердің үлгісін көрсетіп, ауызбіршілік пен ізгілікті дәріптеуде.

«AMANAT» партиясы Шымкент қалалық филиалының ұйымдастыруымен «Таза бейсенбі» экологиялық іс-шарасы кезекті рет Абай ауданындағы «Шымсити» шағын ауданында жалғасын тапты. Шараға партияның қалалық және аудандық филиалдарының қызметкерлері, «Жастар Рухы» жастар қанатының белсенділері мен еріктілер қатысты. Акцияға қатысушылар елдімекен аумағында шашылған қоқыстарды жинап, тазалау жұмыстарын жүргізді.

Ал Түркістан облысы Бәйдібек аудандық филиалы «Жастар Рухы» жастар қанатының белсенді жастары партияның Бәйдібек аудандық филиалының қызметкерлерімен бірлесіп, саяси ұйымның «Ардагерлерді ардақтайық» жобасы және «Таза Бейсенбі» экологиялық акциясы аясында ардагерлердің ауласын қардан тазалау жұмыстарын атқарды. Аманаттықтар Бәйдібек ауданы Алмалы ауылының тұрғыны Қарлығаш Байтемірова әжейдің қар басып қалған ауласын тазартып, отынын бұтап, үйін ретке келтіріп берді. Қарт әжей қолғабыс жасаған ерікті жастарға және филиал қызметкерлеріне алғысын білдіріп, батасын берді.

Экологиялық акция аясында қаланың қоғамдық орындарын қардан тазалау жұмыстары Абай облысында да ұйымдастырылды. Белсенділер көпшілік жүретін қала орталығындағы 700 метр аумақты қардан тазалады. Іс-шараға 20-ға жуық адам қатысты.

«Таза бейсенбі» экологиялық акциясына тұрақты түрде қатысып келеміз. Игі іске қатысып, белсенділік танытып жүргеніміз табиғатқа, қоршаған ортаға қосқан үлесіміз деп білемін. Айналаны таза ұстап, қоғамға жанашырлық білдіру - ол да патриотизмнің көрінісі болып табылады. Сондай-ақ осы акциядан кейін «Ардагерлерді ардақтайық» жобасы аясында қарт адамның ауласын тазалауға бардық. Осындай игі іс-шараларға қатысып, өз үлесімді қосу маған үлкен шабыт сыйлайды», - деді Жастар рухының белсендісі Бекзат Заманбек.

«Таза бейсенбі» тек тазалық іс-шарасы емес, бұл – қоғамды біріктіретін, ізгілікті дәріптейтін ауқымды жоба. Айта кетейік, акция аясында еліміз бойынша 50 мыңға жуық адам 90 мың тоннадан астам қоқыс жинады.