Тергеушілер Оңтүстік Корея экс-президентін тұтқындай алмады

Оңтүстік Кореяның тергеушілері биліктен шеттетілген экс-президент Юн Сок Ёльді тұтқындауға тырысты, бірақ бұған оның күзеті мен жақтастары қарсылық білдірді, деп хабарлайды Azattyq Rýhy BBC-ге сілтеме жасап.

Сыбайлас жемқорлықты тергеу бюросы арест операциясының тоқтатылғанын мәлімдеді.

«Тұтқындау мүмкін болмады, себебі қарсылық өте күшті болды. Айыпталушының мұндай әрекеті өкініш тудырады», – деп хабарлады ведомство өкілдері.

3 қаңтар күні таңертең экс-президенттің Сеулдегі резиденциясын ондаған полиция көлігі қоршап, тергеушілер полицияның сүйемелдеуімен үй аумағына кіруге тырысқан. Алайда күзет қызметі оларды тоқтатқан. Кейін әскери бөлімшенің рұқсатымен аумаққа кіруге мүмкіндік алғанымен, Юнның жеке күзеті тұтқындауға кедергі келтірді.

«Резиденция маңына жиналған шамамен мыңға жуық жақтастары экс-президентке тағылған айыптарды алып тастап, оны қорғауды талап етті. Бұған дейін де Юнның күзеті тергеу әрекеттеріне кедергі келтіріп, ордерлердің заңдылығына күмән келтірген болатын. Экс-президенттің адвокаттары ордерлерді заңсыз деп атады», — деп жазылған сайтта.

Юн Сок Ёльге импичмент жарияланғаннан кейін оған қатысты жемқорлыққа байланысты бірнеше тергеу басталған. Оның жақтастары экс-президенттің жазықсыз екенін алға тартып, әділдік талап етіп жатыр.