2025 жылдың алғашқы екі күнінде 180-нен астам адам құтқарылды
Оның ішінде 57 бала бар
Қазақстанның Төтенше жағдайлар министрлігінің қызметкерлері 2025 жылдың 1-2 қаңтарында 182 адамды, оның ішінде 57 баланы құтқарды және эвакуациялады, деп хабарлайды Azattyq Rýhy ҚР ТЖМ баспасөз қызметіне сілтеме жасап.
«Алғашқы екі тәулікте ТЖМ қызметкерлері 396 рет оқиға орнына шықты. Оның ішінде 195 шақырту өрт жағдайларына, 201-і іздестіру, авариялық-құтқару және басқа да жұмыстарға қатысты болды. Нәтижесінде 182 адам, соның ішінде 57 бала құтқарылды және эвакуацияланды», — делінген хабарламада.
Министрлік азаматтарды өрт қауіпсіздігі ережелерін сақтауға, дауылды ескертулерге назар аударуға, ауа райының өзгерістерін, жолдардың жабылуы туралы хабарламаларды қадағалауға және алыс жолдарға шықпауға шақырды.
«Ауылдық жерлерде тұратын тұрғындарға ауа райы нашарлаған жағдайда ұзақ қашықтыққа жаяу барудан бас тарту ұсынылады», — деп кеңес береді құтқарушылар.
