Ақтөбе облысында екі адам қар құрсауынан құтқарылды

Ақтөбе облысының Байғанин ауданында ауа райының қолайсыздығы мен қардың қалың түсуі салдарынан жеңіл көлік қар құрсауында қалып қойды. Бұл туралы ҚР ТЖМ баспасөз қызметі жазды, деп хабарлайды Azattyq Rýhy.

Оқиға Қарауылкелді ауылынан 20 шақырым жерде болған.

«Құтқарушылар арнайы техника көмегімен көлікті қар құрсауынан шығарып, жолдың тазаланған учаскесіне дейін сүйреп жеткізді. Кейін оларды Қарауылкелді ауылына дейін алып барды. Оқиға салдарынан зардап шеккендер жоқ», – делінген хабарламада.

Төтенше жағдайлар министрлігі тұрғындарға дауылды ескертулерге назар аударып, ауа райы қолайсыз болған жағдайда елді мекеннен шықпауға кеңес береді.