Ғылыми жобалардың 70%-дан астамы практикалық пайда әкелмей, мақалалар мен кітаптар шығарумен аяқталады – Антикор
2016 жылдан бастап мемлекет ғылыми жобаларды коммерцияландыруға шамамен 32 млрд теңге жұмсады
Ғылымды қаржыландыру саласындағы миллиардтаған долларлық инвестицияға қарамастан, ғылыми жобалардың 70%-дан астамы практикалық пайда әкелмей, мақалалар мен кітаптар шығарумен аяқталады. Бұл туралы Сыбайлас жемқорлыққа қарсы іс-қимыл агенттігінің Білім және ғылым саласындағы жемқорлық тәуекелдерін жою мәселелері бойынша өткізген ведомствоаралық кеңесінде айтылды, деп хабарлайды Azattyq Rýhy ведомствоның баспасөз қызметіне сілтеме жасап.
Агенттіктің мәліметінше, жобаларды іріктеу процесі ашық емес, олардың сараптамасы формальді түрде жүргізіледі, нақты нәтижелер үшін жауапкершілік жоқ.
2016 жылдан бастап мемлекет ғылыми жобаларды коммерцияландыруға шамамен 32 млрд теңге жұмсады, олардың едәуір бөлігі мәлімделген мақсаттарға қол жеткізе алмады.
«Нақты ғылыми жұмыстың орнына қаражат зерттеулерге байланысты емес шығындарға кетеді, жоба бюджеттері негізсіз көтеріледі. Ғылыми тағылымдамаларға гранттар беру мәселелерінде де елеулі жемқорлық тәуекелдері анықталды. Бұл жағдайдың себептері ғылымдағы дұрыс емес басымдықтар, жобаларды таңдау және олардың нәтижелері үшін жауапкершіліктің болмауы, цифрландырудың әлсіздігі және шығындардың ашық еместігі болды», - делінген хабарламда.
