«Үстелдің бұрышына соғып алған»: алматылық дәрігерлер зейнеткердің көру қабілетін сақтап қалды

Орталық қалалық клиникалық ауруханаға ауыр көз жарақатымен 69 жасар ер адам түсті. Науқастың айтуынша, ол үстелдің бұрышына соғылып, нәтижесінде көзіне қатты зақым келген, деп хабарлайды Azattyq Rýhy Денсаулық сақтау министрлігіне сілтеме жасап.

Науқасқа склераның жарылуымен көз алмасының ауыр соғылуы, көздің ішкі қабығының түсуі, жарақаттан кейінгі афакия, аниридия, гемофтальм және торлы қабықтың ажырауы диагнозы қойылды.

Дәрігерлер кезең-кезеңімен көмек көрсету туралы шешім қабылдады.

«Бірінші кезеңде склера жарасына алғашқы хирургиялық ем жүргізілді. Келесі кезеңде силикон енгізумен витрэктомия, торлы қабықтың лазерлік коагуляциясы (ЭЛКС) және иридохрусталдық диафрагманы имплантаттаудың бірегей процедурасын қамтитын жоғары технологиялық ота жасалды. Науқас үшін арнайы жасанды көз айнасы мен линза жиынтығы әзірленді», - делінген хабарламада.

Отаны офтальмология бөлімшесінің меңгерушісі Гүлзат Абдраимова жүргізді.

Мамандардың жоғары кәсібилігінің арқасында науқастың көру қабілеті сақталып, визуалды функциялары қалпына келтірілді.

«Орталық қалалық клиникалық аурухананың бүкіл ұжымына, әсіресе Гүлзат Абдраимоваға алғысымды білдіремін. Диагноз үкім сияқты естілді, бірақ дәрігерлер мені өз бақылауына алып, мүмкін емес нәрсені жүзеге асырды - маған көру қабілетін қайтарды!», - деді науқас.