Қоғамды адал емес кәсіпкерлерден қорғау қажет – Еділ Жаңбыршин

Бүгін Мәжілістің пленарлық отырысында депутаттар Әкімшілік құқық бұзушылық туралы кодекске енгізілетін өзгерістерді екінші оқылымда мақұлдады. Заң жобасын талқылау барысында бизнеске қатысты қолданыстағы айыппұлдардың көлемі туралы қызу пікірталас туындады, деп хабарлайды Azattyq Rýhy. 

«Ақ жол» Қазақстан демократиялық партиясы фракциясы Кодекс жобасына қарсы дауыс берді. Мәжіліс депутаты, партия төрағасы Азат Перуашев қазіргі айыппұлдардың кәсіпкерлер үшін шамадан тыс жоғары екенін айтты. Алайда «Ақ жол» фракциясының ұстанымын басқа депутаттар қолдамады. 

Өз сөзінде Мәжілістің Экология және табиғат пайдалану мәселелері жөніндегі комитетінің төрағасы, «AMANAT» партиясы фракциясының мүшесі Еділ Жаңбыршин азаматтардың құқықтарын, денсаулығын және қауіпсіздігін қорғау – ел Конституциясында бекітілген басты қағидалар екенін атап өтті. Алайда, оның айтуынша, кейбір кәсіпкерлер бұл нормаларды сақтамай, тұтынушыларды алдауды жалғастыруда. 

«Біз бағаның дұрыс көрсетілмеуі, мерзімі өткен немесе техникалық регламенттерге сәйкес келмейтін тауарлардың сатылуы сияқты құқық бұзушылықтармен жиі кездесеміз. Бұл тек тұтынушылардың құқықтарын бұзумен шектелмей, бизнестің беделін түсіреді. Мысалы, кейбір тауарларға 50% жеңілдік бар деп көрсетілгенімен, кассада мүлдем басқа баға белгіленеді. Мұндай жағдайлар, әсіресе, әлеуметтік тұрғыдан осал топтарға – зейнеткерлерге, көпбалалы отбасыларға және мүмкіндігі шектеулі жандарға ауыр тиеді», – деп атап өтті Жаңбыршин.  

Статистикаға сүйенсек, енгізілген айыппұлдар нормалары тиімді нәтиже көрсетуде. Депутаттың айтуынша, 1059 әкімшілік шара қолданылғаннан кейін қайталанған құқық бұзушылықтар саны 47 жағдайға дейін азайған. 

«Бұл норманың жұмыс істеп тұрғанын дәлелдейді», – деді ол. 

Депутат халықаралық тәжірибені мысалға келтірді. Оның айтуынша, Еуропада тұтынушылардың құқықтарын бұзған компаниялар қомақты айыппұлдарға тап болады. Мысалы, Ұлыбританияда бір ритейлер бағаларды дұрыс көрсетпегені үшін 500 мың АҚШ доллары көлемінде айыппұл төлесе, Чехияда бір компания 280 мың кронға жазаланған. 

Депутаттардың пікірінше, қолданыстағы айыппұлдар азаматтардың мүдделері мен денсаулығын басты орынға қоятын әділ қоғам құру үшін тиімді құрал саналады.