«Нағыз шоу болмақ»: Жалғас Жұмағұлов бокс алаңында алғашқы жекпе-жегі өтетінін мәлімдеді

Қазақстандық ММА спортшысы Жалғас Жұмағұлов (17-9) бокс ережелері бойынша алғашқы жекпе-жегіне дайындықты бастап кетті. Ол 2024 жылдың 20 желтоқсанында Астанада өтетін Fight Night лигасында шаршы алаңға шығады, деп хабарлайды Azattyq Rýhy Sport.kz-ке сілтеме жасап. 

«Менің алғашқы бокс спаррингім! 20 желтоқсанда дебют жасаймын. Менің жекпе-жегімді күтіңіздер, нағыз шоу болмақ» – деп жазды бұрынғы UFC спортшысы әлеуметтік желідегі парақшасында.

Еске сала кетейік, 9 қарашада Жалғас Жұмағұлов Словакияның Братислава қаласында өткен чехиялық Oktagon MMA промоушенінде валлийлік Аарон Эбиді (16-10-1) төрешілердің бірауызды шешімімен жеңіп шыққан болатын. Бұл жеңістен кейін ол промоушеннің жеңіл салмақтағы рейтингінде екінші орынға көтеріліп, чемпионға ашық түрде шақырту жолдады.