Қостанай облысында көлікке техникалық бақылауды дұрыс жасамаған маман жауапқа тартылды

Қостанай облысында осы жылдың тамыз айында қайғылы жағдаймен аяқталған жол-көлік оқиғасы тіркелді. Mercedes-Benz автокөлігінің жүргізушісі жаяу жүргіншіні қағып, салдарынан зардап шеккен адам оқиға орнында көз жұмды. Жүргізуші апатты болдырмау үшін шұғыл тоқтауға тырысқанын айтқанымен, тежегіштің іздері оқиға орнынан табылмады, деп хабарлайды Azattyq Rýhy Polisia.kz-ке сілтеме жасап.

Тергеу барысында көліктің тежегіш жүйесінде айтарлықтай ақау болғаны анықталды. Нақтырақ айтқанда, дөңгелектерінің бірінде тежегіш дискісі жоқ болып шықты. Бұл тежеу тиімділігін күрт төмендеткен. Айта кетерлігі, апатқа дейін бес күн бұрын бұл көлік міндетті техникалық байқаудан өткен. Көліктің тежегіш жүйесіндегі анық ақауларға қарамастан, оған жарамды деген рұқсат берілген.

«Осыған байланысты жүргізушіге қатысты қылмыстық іс қозғалып, сот оны екі жылға бас бостандығынан және бес жылға жүргізуші куәлігінен айыру туралы шешім шығарды. Сонымен қатар техникалық байқауды жүргізген кәсіпкер де жауапқа тартылды», - делінген хабарламада.

Жыл басынан бері құқық қорғау органдары түрлі мемлекеттік мекемелерге осындай құқық бұзушылықтарды жою жөнінде 1000-нан астам ұсыныс жолдаған. Бұл жағдай жол қозғалысы қауіпсіздігін қамтамасыз етуге арналған шаралардың күшеюін талап ететінін көрсетеді. Осындай қайғылы оқиғалардың алдын алу үшін техникалық байқау жүйесінің сапасын бақылауды қатаңдату қажет.