Шымкентте кезекті есірткі зертханасы табылды

Шымкентте есірткі өндірумен айналысқан екі адам ұсталды. Олар осы мақсатта есірткі зертханасын ұйымдастырған, деп хабарлайды Azattyq Rýhy.

Жедел іздестіру барысында «Альфа PVP» есірткі затының 10 кг-ға жуық өнімі ұнтақ түрінде, 60 литрге жуық өнімі сұйық түрінде, 240 литр химиялық заттар (прекурсорлар) және лабораториялық құрал жабдықтар (вакуум, реактор, желдеткіш, сүзгі, таразы, фольга, гофралар, колба, жылытқыш, тоңазытқыш құралдар, респиратор, қолғап және т.б.), сондай-ақ дайын өнімдерді кептіруге арналған сөрелер анықталып, тәркіленді.

«Аталған факті бойынша ҚР ҚК-нің 297-бабы 3-бөлігінің 1), 3)-тармақтары бойынша сотқа дейінгі тергеп тексеру амалдары басталды, бұл қылмыс үшін 15 жылға дейн бас бостандығынан айыру жазасы көзделген.

Күдіктілерге қатысты «күзетпен ұстау» түріндегі бұлтартпау шарасы таңдалған. ҚР ҚПК-нің 201-бабының 1-бөлігіне сәйкес өзге ақпарат жариялануға жатпайды», - делінген қалалық прокуратура хабарламасында.