Бір түнде 188 рейс: Астана қармен қалай күресіп жатыр?
Астанада бір түнде 2 400 текше метр қар шығарылды
Елордадағы коммуналдық қызметтер қардың мол мөлшеріне байланысты тәулік бойы күшейтілген жұмыс режимінде бірнеше ауысыммен жұмыс істеп жатыр, деп хабарлайды Azattyq Rýhy Астана әкімдігінің ресми сайтына сілтеме жасап.
«Бүгінгі таңда қар тазалау жұмыстарына 1 200-ден астам арнайы техника мен 2 400-ден астам жол жұмысшысы жұмылдырылды. 9-нан 10 қарашаға қараға эн түні қаладан 2 400 текше метр қар шығарылды, бұл 188 ауыр жүк көлігінің рейсіне тең», – делінген әкімдік хабарламасында.
Ең алдымен қалада қозғалысы қарқынды учаскелер қардан тазартылып жатыр. Бұл жол кептелістерінің алдын алуға мүмкіндік береді. Сонымен қатар орташа қозғалыс қарқындылығындағы аумақтар – алаңдар, вокзал маңы, тротуарлар, әлеуметтік нысандарға кіреберіс жолдар да қардан тазаланып жатыр.
Қалада бірнеше жабдықталған қар полигондары жұмыс істеп тұр. Олар самосвалдардың нөмірін анықтауға арналған жүйелермен, бейнебақылау камераларымен және жарықтандырумен қамтамасыз етілген.
«Қолайсыз ауа райына байланысты Астана әкімдігі тұрғындар мен қонақтарды көшеде барынша мұқият және сақ болуға шақырады. Бұл жазатайым оқиғалардың алдын алуға мүмкіндік береді», – деп мәлімдеді әкімдік.
