World Boxing чемпионаты: қазақстандық спортшының жекпе-жегі даумен аяқталды

World Boxing ұйымының тарихтағы алғашқы әлем чемпионатында қазақстандық жас боксшы Асылхан Көшербай мен австралиялық Купер Макконнелл арасындағы жекпе-жек үлкен даумен аяқталды, деп деп хабарлайды Azattyq Rýhy Sports.kz-ке сілтеме жасап.

19 жасқа дейінгі спортшылар арасындағы финалда 65 келіге дейінгі салмақта Көшербай мен Макконнелл «алтын» үшін бақ сынасты. Жекпе-жек барысында қазақстандық боксшы қарсыласын бірінші және екінші раундта екі рет нокдаунға жібергеніне қарамастан, төрешілердің шешімімен жеңіс 3:2 есебімен австралиялық боксшыға берілді.

Төрешілердің бұл шешімі жанкүйерлер мен сарапшылардың арасында үлкен резонанс тудырып, әлеуметтік желілерде көптеген қазақстандықтар Көшербайға қолдау білдіріп, төрешілердің әділдігіне күмән келтірді. Осылайша, Макконнелл чемпионаттың «алтын» медалін иеленсе, Көшербай «күміспен» шектелуге мәжбүр болды.