Қазақстанда спорттық жабдықтардың техникалық регламенті әзірленбек

Қазақстанда бірқатар даулы оқиғадан кейін спорттық жабдықтардың қауіпсіздігін реттейтін техникалық регламент әзірлеу жоспарланып отыр, деп хабарлайды Azattyq Rýhy Сауда және интеграция министрлігінің баспасөз қызметіне сілтеме жасап.

Министрліктің мәліметінше, 2024 жылы Кеден одағы аясында міндетті талаптарға жататын өнімдердің бірыңғай тізіміне «спорттық жабдықтар мен инвентарь» қосылды. Бұл өзгеріс Қазақстанның бастамасымен 2019 жылы болған қауіпсіздікке қатысты оқиғалар, соның ішінде футбол қақпаларының құлау жағдайларына байланысты енгізілген.

Қазіргі уақытта Сауда және интеграция министрлігі спорттық жабдықтарға жаңа техникалық регламент әзірлеуді жоспарлап отыр. Бұл регламент спорттық құрылымдар мен жабдықтардың қауіпсіздігін қамтамасыз етіп, осындай жағдайлардың алдын алуға бағытталмақ.

Сонымен қатар Туризм және спорт министрлігі ұлттық техникалық регламентті әзірлеу бойынша жұмыс тобын құру туралы бұйрық дайындап жатыр.