Оралда жол апатына себепкер болған әкімдік қызметкері мас болған
Оған қатысты әкімшілік іс қозғалды
Орал қаласында жаппай жол апатына себепкер болған әкімдік қызметкері оқиға кезінде мас болған, деп хабарлайды Azattyq Rýhy жергілікті «Мой город» басылымына сілтеме жасап.
Басылымның жазуынша, 1 қазанда Орал қаласында төрт көліктің қатысуымен жол апаты болған. Жергілікті БАҚ-тың сол күнгі ақпаратынша, БҚО әкімі аппаратының қызметкері болып табылатын 44 жастағы Volkswagen Tiguan жүргізушісі бағдаршамда тұрған Mercedes-ке соғылып, соққыдан Вазамен және Skoda Rapid-пен соқтығысқан.
БҚО полиция департаменті медициналық куәландыру нәтижелеріне сәйкес, Volkswagen Tiguan жүргізушісі «орта дәрежелі» мас күйінде болғанын хабарлады.
«Оған қатысты ӘҚБтК-нің 608-бабы бойынша әкімшілік іс қозғалды. Қазіргі уақытта тиісті сараптамалар тағайындалды, олардың нәтижелері бойынша ЖКО фактісі бойынша материалдар сотқа жіберіледі», - деп хабарлады полициядан.
