Батыс Қазақстанда тағы 4 адам коронавирус инфекциясын жұқтырды

Батыс Қазақстан облысында  тағы 4 адам коронавирус инфекциясын жұқтырды. Бұл туралы Мемлекеттік комиссияның шұғыл штабы хабарлады.

Коронавирус инфекциясы анықталған 4 адамның бірі — 1993 жылғы Ресей Федерациясында вахта әдісімен жұмыс істейтін Түркістан облысының тұрғыны болса, 3-еуі  жүк тасымалымен айналысатын 1987, 1976 және 1963 жылғы Тәжікстан және Қырғыз Республикасының  азаматтары.

«Ресей Федерациясымен шекарадағы «Сырым» автоөткеліндегі санитарлық-карантиндік бекетте эпидемиолог мамандар байланыссыз термометрия жасап, сауалнама жүргізу кезінде азаматтардың денсаулықтарына қатысты шағымдары болмаған. Жүк тасымалдаушыларға экспресс диагностика жасалып, вирусты жұқтырғандары анықталған. Коронавирус жұқтырғандар карантиндік және провизорлық стационарларға жатқызылды», - делінген хабарламада.

ПТР диагностикалық зерттеу қорытындысымен барлығына да COVID-19 диагнозы қойылып, облыстық жұқпалы аурулар ауруханасына орналастырылды. Науқастармен қарым-қатынаста болған адамдар анықталып, олар медициналық бақылауға алынды.

Ауру ошақтарында дезинфекциялық жұмыстар жүргізілді. Эпидемияға қарсы шаралар қолға алынған.

Бүгінге дейін облыста коронавирус жұқтырған 203 адам тіркелді, оның ішінде емделіп шыққандар саны — 41.