Ақтөбе облысы: Әйтеке би ауданында су тасқынынан зардап шеккендер үйлі болды

Ақтөбе облысының Әйтеке би ауданында су тасқынынан зардап шеккендердің барлығы үйлі болды. Бұл туралы Azattyq Rýhy агенттігі облыс әкімдігінің баспасөз қызметіне сілтеме жасап хабарлайды.

Әкімдік мәліметінше, салынған 26 тұрғын үйдің кілтін табыстау рәсімі аудан орталығы – Темірбек Жүргенов ауылында өтті. Жергілікті тұрғындардың қуанышына аудан әкімі Дәулетияр Тоғызбаев, BI Group компаниясы мен мердігер компаниялардың өкілдері ортақтасты.

Аудан басшысы құттықтау сөзінде жерлестеріне түсіністік танытқандары үшін, сондай-ақ, мердігер компанияларға аз уақытта сапалы нәтиже көрсеткені үшін алғысын жеткізді.

Өз кезегінде мердігерлер мен BI Group компаниясы атынан әйтекебилік жаңа қоныс иелеріне тұрмыстық техникалар сыйлыққа берілді.

Тұрғындар өз кезегінде құрылыстың уақытылы және сапалы аяқталғаны үшін ризашылығын білдірді.

«Әйтеке би ауданында көктемгі су тасқынынан зардап шеккендерді қолдау шаралары жан-жақты жүргізілді. Мемлекет басшысының тапсырмасына сәйкес, барлық тұрғын тиісті көмек алып, баспанамен қамтылды.

Ауданда 150-ге жуық арыз түсіп, комиссияның техникалық бақылауы нәтижесінде, 64 жөндеу жұмыстарына тиісті қаражаты бөлінді. 51 үй тұруға жарамсыз деп танылды.

Соның ішінде, 25 отбасы Б.Өтемұратов қорының қолдауымен екінші нарықтағы үйді алуға ынта білдіріп, осыдан 2 ай бұрын баспаналы болса, қалған 26 тұрғын жаңа үй салуды таңдаған еді. Тұрғын үй құрылысына  BI Group  751,4 млн теңге бөлді», - делінген хабарламада.