«Комиссияның келу мүмкіндігін пайдаланыңыз»: «Жер аманаты» өңірлерде көшпелі отырыстар өткізеді

«AMANAT» партиясының «Жер аманаты» комиссиясы жақын арада еліміздің барлық өңірлерінде ресми көшпелі отырыстар өткізуге ниетті. Бұл туралы «Жер аманаты» комиссиясы төрағасының орынбасары, Мәжіліс депутаты Бақытжан Базарбек өзінің Facebook парақшасында айтты, деп хабарлайды Azattyq Rýhy.

Мемлекет басшысы Қасым-Жомарт Тоқаевтың тапсырмасы бойынша пайдаланылмаған және заңсыз берілген ауыл шаруашылығы жерлерін мемлекеттік меншікке қайтару бойынша жұмыстар жүргізілуде. «AMANAT» партиясы ел президентінің қоғамдық тірегі бола отырып, осы мәселені шешуге алғашқылардың бірі болып қосылды.

«Жер аманаты» комиссиясының ресми отырыстары 2024 жылдың тамыз-желтоқсан айлары аралығында республикалық маңызы бар барлық облыстар мен қалаларда өткізіледі.

«Біз тек қана игерілмей, пайдаланбай жатқан жерлер бойынша ғана емес, сондай-ақ азаматтар мен ұйымдардың жер учаскелерін беру кезіндегі әкімдіктердің заңсыз істеріне мен басқа да заңсыз әрекеттерге қатысты өтініштерін қарастырамыз. Баршаңызға айтарым, комиссияның сіздің өңіріңізге келу мүмкіндігін пайдаланыңыз, жер қатынастарындағы заңдылықты, тәртіп пен әділдікті бірге қалпына келтірейік», – деді Бақытжан Базарбек.

Айта кетейік, «AMANAT» партиясының «Жер аманаты» республикалық жер комиссиясы 2022 жылдың маусым айында құрылған болатын. Осы уақытқа дейін мемлекетке 10,8 миллион гектардан астам ауылшаруашылық жерлері қайтарылды, оның үш миллионға жуығы азаматтарға берілді. Сондай ақ комиссияның бастамасымен мемлекет меншігіне қайтарылған ауыл шаруашылығы жерлеріне ашық қолжетімділік беру мақсатында  jerkarta.gharysh.kz. геоқызметі іске қосылды. Жер мәселелері бойынша үш мыңнан астам өтініш қаралып, олардың 80%-ы оң шешімін тапты.

«Жер аманаты» комиссиясына өтінішті «AMANAT» республикалық қоғамдық қабылдау арқылы келесі байланыстар бойынша беруге болады:

1. Call-центр: 8 800 080 4441 (Қазақстан бойынша қоңырау шалу тегін);

2. WhatsАpp: 8 700 800 4441

3. E-mail: komek@amanatpartiasy.kz