Астанада бақшасына есірткі өсіргендер бірнеше жылға сотталды

Астана қаласының тұрғындары қарасораны заңсыз өсіргені үшін сотталды. Бұл туралы Azattyq Ruhy агенттігі қалалық прокуратураның баспасөз қызметіне сілтеме жасап хабарлайды.

Мемлекеттік айыптаушы – прокурор өз үйінде сату мақсатынсыз жеке пайдалануы үшін құрамында есірткі заттары бар өсімдіктерді заңсыз егіп, өсірген екі сотталушының кінәсін дәлелдеді.

Бірінші жағдайда, сотталушы үй бөлмесінде тұқымдар мен қажетті құрал-жабдықтарды алдын ала сатып алып, каннабис өсімдігін (қарасора) өсірген.

Ал тағы бір елордалық өз үйінің бақшасында өсірген.

Сот үкімімен кінәлілердің әрқайсысы 3 жылға бас бостандығынан айыру жазасына сотталды. Сот актілері заңды күшіне енді.

«Құрамында есiрткi заттар бар, өсiруге тыйым салынған өсiмдiктердi заңсыз егіп-өсіру үшін 8 жылға дейін бас бостандығынан айыру жазасы қарастырылғанын ескертеміз.

Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу үшін мүлкі тәркілеумен 20 жылға дейінгі мерзімге бас бостандығынан айыру не өмір бойына бас бостандығынан айыру жазасы көзделген», - делінген прокуратура хабарламасында.