Қазақстандық кино халықаралық фестивальде марапатқа ие болды

Измирде өткен «Тұран» халықаралық кинофестивалінде Қазақстан екі бірдей марапатқа ие болды, деп хабарлайды Azattyq Ruhy 24KZ-ке сілтеме жасап.

Халықаралық жарыста «Кинематографияға қосқан үлесі үшін» сыйлығы «Қазақфильмге» табыс етілсе, Дильшат Рахматуллиннің «Бесік жыры» туындысы бірінші орынға лайық деп танылды. Түркияның Мәдениет және туризм министрлігі мен Халықаралық ТҮРКСОЙ ұйымының ұйымдастыруымен өткен фестивальге 77 елден 1055 өтініш келіп түскен. Бір ғана Қазақстанның өзінен 21 фильм бірнеше номинация бойынша бақ сынады. Іс-шараның мақсаты – түбі бір түркі жұртының кинематографиясын халықаралық деңгейге шығару арқылы мәдениетін паш ету, дейді ұйымдастырушылар. Ал «Сүйінбай сазы» фольклорлы-этнографиялық ансамблі фестиваль қонақтары мен қатысушыларына ән-жырдан шашу шашты.

«Тұран» халықаралық кинофестивалі түркі әлемінің кино саласындағы майталмандарының басын қосқан ерекше платформа болды. Алғашқы фестивальге әсіресе жастар көп қатысты. Мұндай іс-шаралар біз үшін маңызды. Туыстас жұрттың үздіктерімен қатар жас таланттардың да жолын ашады деп ойлаймын», - деді «ТҮРКСОЙ» халықаралық ұйымының бас хатшысы Сұлтан Раев.