«Жаңа Үкіметке жаңа міндеттер жүктелді»: депутат Президент тапсырмалары туралы

Парламент Мәжілісінің депутаты, «AMANAT» партиясы фракциясының мүшесі Қайрат Балабиев Үкіметтің кеңейтілген отырысында Президенттің айтқан экономиканың ұзақмерзімді дамуын қамтамасыз ету туралы тапсырмасына пікір білдірді, деп хабарлайды Azattyq Ruhy.   

«Өткен жылы жалпы экономика 5,1 пайызға өсіп, даму қарқыны бәсеңдемеді. Десе де, қазір Үкіметке жайбарақат отыратын емес, жаңа серпінмен іске кірісетін уақыт. Мақсат айқын, бағыт белгілі болса да, жол берілген қателіктерді жою қажет. Жыл сайын ішкі жалпы өнімді 6 пайызға арттырып, 2029 жылға қарай экономика көлемін 450 миллиард долларға жеткізу керек.

Президент Қасым-Жомарт Тоқаев алдағы міндеттерді орындау үшін Үкімет пен әкімдіктерге берілген құзырет дұрыс қолданылмай, салдарынан реформалардың жүзеге асырылмай жатқанын айтып, жұмыс істеу тәсілін түбегейлі өзгерту, ұстанымдарын жүйелеуді, экономиканың ұзақ мерзімді дамуын қамтамасыз етуді тапсырды», - деп атап өтті депутат.

Тақырыпқа орай: Президент экономиканы ырықтындару бойынша Жарлық әзірлеуді тапсырды

Оның айтуынша, соңғы бес жылда салық тапшылығы 11 триллион теңгеден асып кеткен. Президент салық салудың кері осы екен деп, қосылған құн салығын 12 пайыздан 16 пайызға дейін өсіру көлеңкелі экономиканың үлесін арттырып, инфляцияның өсуіне әкеп соғып, құн салығын өсірумен мәселе шешілмейтінін, жаңа Салық кодексін әзірлеу барысына көңілі толмайтынын айтты. Себебі бизнестің өркендеуіне салық кедергі болып жатқан жағдайлар жоқ емес.

«Сондықтан бизнеске әкімшілік қысым көрсетуді азайтып, нақты қолдауды көбейтіп, салықты жүйесіз өсіруден бұрын Үкіметке алдымен қуатты экономика қалыптастыру керек. Президент салық жеңілдіктерін 20 пайызға азайту тапсырмасының орындалмағаны мен шешу жолдарының әзірленбегеніне тоқталды. Сондай-ақ салық жүйесі цифрландырылмақшы. Президент мемлекеттік кірістер комитетінде 2000-2014 жылдары қосылған 14 ақпараттық жүйенің кеңінен қолданылмағанын, жаңа халықаралық жүйеге ауыспағанын айтып, ведомствоның барлық ақпараттық жүйесіне ІТ-аудит жүргізуді, жаңа Салық кодексін әзірлеумен қатар мемлекеттік кірістер комитетінің жаңа ақпараттық архитектурасын қалыптастыруды тапсырды», - деп жазды депутат желідегі парақшасында.

Тақырыпқа орай: «Салықты жайдан жай көбейте салуға болмайды»: Президент салық жүйесін реттеуді тапсырды

Жалпы салық және бюджет саласына түбегейлі реформалап, соның арқасында мемлекет пен бизнестің арасында жаңа қоғамдық шарт жасалатынын, осылайша ұлттық табысты әділ бөлудің парасатты жолы қалыптастырылмақ. Бұл – Үкіметтің алдында тұрған негізгі басымдық болмақ.

Осылай деген Қайрат Балабиев Президенттің сөзінен үзінді келтірді.

«...Жаңа инвестициялық кезеңді бастау керек. Өндіру саласындағы жобалардан түскен пайда қайтадан инвестиция ретінде экономикаға салынып жатыр. Тікелей шетел инвестициясы, негізінен, осы қаражаттың есебінен қамтамасыз етіліп отыр.

Негізгі капиталға салынған инвестицияның ішкі жалпы өнімге шаққандағы үлесі азайып барады. Бұл күрделі жағдай деуге болады. Себебі, экономикаға жеткілікті қаражат салынбай жатыр. Соның салдарынан, алдағы жылдары елдің даму қарқынын сақтап тұрудың өзі қиын болуы мүмкін.

Сондықтан ішкі және сыртқы инвестицияны айтарлықтай көбейту керек. Бұл – жаңадан құрылған Инвестициялық штабтың негізгі міндеті. Штаб елге инвестиция тартуға қажетті біртұтас экожүйе қалыптастыруы керек. Даму институттарының жұмысын жандандырып, бизнес өкілдерімен тиімді диалог жүргізуге тиіс. Шетелдегі мекемелердің, орталық пен аймақтардың арасында тығыз байланыс орнату қажет. Ең бастысы, Инвестициялық штаб қажетті шешімді дер кезінде қабылдауы керек».

Тақырыпқа орай: Кейбір инвестор тапқан табысын тек қалтаға басқанды жөн көреді – Тоқаев