Алматыда 3,5 мың медқызметкерге үстемақы төленетін болды
Төлемдер үш санат бойынша жүргізіледі
Алматыда 3 557 медқызметкерге үстемақы төлеу үшін 965 миллион теңге бөлінді, деп хабарлайды Azattyq-ruhy тілшісі.
3 санат бойынша жүргізілетін төлемге 500-ден астам дәрігер, 1,7 мың орта медицина қызметкері, 549 кіші медицина қызметкері және денсаулық сақтау саласының өзге де 764 қызметкері ілінген.
Үстемақы амбулаториялық емхананың кейбір қызметкерлеріне де берілмек. Блок-бекеттерде карантиндік режимде кезекшілік жасап тұрған денсаулық сақтау ұйымының мамандары да аталған төлемге ілінген.
«Бірінші тәуекел тобына реанимация бөлімшелері мен инфекциялық стационарлардың дәрігерлері, орта және кіші медицина қызметкерлері жатқызылған. Екінші тәуекел тобына провизорлық стационарлардың дәрігерлері, орта және кіші медицина қызметкерлері, медициналық жедел жәрдем дәрігерлері мен фельдшерлері, оның ішінде амбулаториялық-емханалық ұйымдар, сондай-ақ санитарлық авиацияның орта медицина қызметкерлері жатқызылған. Үшінші топқа карантиндегі адамдарға қараған, жедел жәрдем көлігінің жүргізушілері, биологиялық материалдарды алған зертханадағы мамандар жатады», - деді Алматы қаласы Қоғамдық денсаулық сақтау басқармасының басшысы Тілеухан Әбілдаев.
Блок-бекеттерде кезекшілікте тұрған медицина қызметкрелеріне де үстемақы беріледі. Әзірге қалалық балалар жұқпалы аурулар ауруханасының 1-тәуекел тобына жататын барлық медицина қызметкерлеріне ғана үстемақы аударылған.
Әмірболат Құсайынұлы, Алматы
