Алматыда жойқын жер сілкінісі болмайды – Бас сейсмолог
Оның айтуынша, байбаламға салынудың ешқандай себебі жоқ
Алматыдағы жер сілкінісіне байланысты Ұлттық сейсмологиялық бақылаулар мен зерттеулер ғылыми орталығының директоры Дәулет Сәрсенбаев мәлімдеме жасады, деп хабарлайды Azattyq Rýhy.
Ол Алматыда жақын уақытта жойқын жер сілкінісі болмайды деп сендірді.
«Алматының тұрғындары мен қонақтарын жақын арада жойқын жер сілкінісі күтілмейтініне сендіргім келеді. Бүгін болған сейсмикалық оқиға ҚХР мен Қырғызстан Республикасының аумағында болды. Алматы мен Алматы облысының тұрғындары, Жетісу облысының бір бөлігінде сезілген сілкіністер «афтершок» болып табылады. Орталық Азияның барлық дерлік елдері сейсмикалық оқиғаны сезінді. Қазіргі уақытта 10-нан астам афтершок тіркелді, оның ішінде Алматы тұрғындары 2 афтершокты сезінді. Байбаламға салынудың ешқандай себебі жоқ», - деді ол.
