Талдықорғанда жалған мемлекеттік нөмір тағып жүрген қала әкімінің көлігі ұсталды

Azattyq Rýhy

Қала әкімдігі оқиғаға байланысты түсінік бермеді

Талдықорғанда жалған мемлекеттік нөмір тағып жүрген қала әкімінің көлігі ұсталды
Фото: рolisia.kz

Қаңтардың үші күні патруль полициясы қала көшесінде жалған мемлекеттік нөмір тағып жүрген автокөлікті тоқтатқан. Тексеру барысында көліктің қала әкіміне тиесілі екені анықталды, деп хабарлайды Azattyq Rýhy ҚазАқпаратқа сілтеме жасап.

Жергілікті полицияның мәліметінше, қазір қала әкімінің қызметтік көлігі айып тұрағына қойылған. Ал көлікке жалған мемлекеттік тіркеу нөмірін тағып жүрген көлік жүргізушісі 5 тәулікке қамауға алынған.

Куәгерлердің айтуынша, көлік тізгініндегі азамат тәртіп сақшыларының талабына көнбей, қарсылық көрсеткен. Қала әкімінің атын атап, қызметтік лауазымымен қорқытқан жүргізушіге қатысты күш қолдануға тура келіпті.

Қала әкімдігі оқиғаға байланысты түсінік бермеді.

Еске сала кетейік, қызметтік көліктің иесі - Ернат Бәзіл былтырғы 30-маусымда Жетісу облысы әкімінің өкімімен Талдықорған қаласының әкімі болып тағайындалған болатын.

×
Бұл желілік ресурстың ақпараттық өнімдері 18 жастан асқан адамдарға арналған.