Алматы облысының тұрғындары депутатқа мәселелерін айтты

Алматы облысында жайылымдық және суармалы жерлердің мәселесі әлі толық шешімін таппаған. Егін алқаптарын суаратын жүйелердің әбден тозығы жеткен, деп хабарлайды Azattyq Ruhy тілшісі. Бұл мәселелер Мәжіліс депутаты Данияр Қасқарауовтың  Алматы облысының тұрғындарымен кездесуі кезінде айтылды. Жамбыл ауданындағы халықтың айтуынша, шешімін таппаған жұмыстар өте көп. 

Өңірдің проблемаларын талқылауға ауыл әкімдері, мәслихат депутаттары, қоғамдық ұйымдардың өкілдері мен жергілікті тұрғындар қатысты.

«Жиында Жамбыл ауданындағы басым сала ауылшаруашылығы болғандықтан, төрт түліктің жем-шөбі мен жайылымы туралы, сондай-ақ, егін алқаптарын суғаруға байланысты өзекті сұрақтар талқыланды. Мұндағы суару жүйелерінің тозығы жеткендіктен тасымалдау кезінде судың 80% жоғалады. Осыған байланысты аудандағы су жүйелерін қалпына келтіру үшін жергілікті және республикалық бюджеттен 28 млрд теңге қарастырылып, оның биыл 1 млрд теңгесі бөлінген», - деп хабарлады ҚР Парламент Мәжілісінің баспасөз қызметі.  

Жүздесу барысында ауыл халқын толғандырып жүрген таза ауыз сумен қамтамасыз ету, мектепке арналған қосымша ғимараттың құрылыс жұмысы, қаңғыбас иттерге қатысты көптеген мәселелер көтеріліп, депутат нақты сұрақтарға жауап берді.

Кездесуден кейін Данияр Қасқарауов Ұзынағаш ауылындағы 1500 балаға арналған мемлекеттік-жекеменшік әріптестік негізінде бой көтерген жаңа мектептің жұмысымен танысты. Бұл білім ошағы заманауи құралдармен жабдықталып, оқушылардың  білім алуына барлық жағдай жасалған. Алдағы екі жылда Жамбыл ауданында осындай 8 мектеп салу жоспарланып отыр.