Костенко шахтасында соңғы кеншінің денесі табылды: марқұмның туыстары мәлімдеме жасады

Қарағанды ​​облысындағы Костенко шахтасында қаза тапқан соңғы кеншінің денесі 30 қазанда таңертең табылып, іздеу жұмыстары аяқталды, деп хабарлайды Azattyq Ruhy.

Бұл ақпаратты қарағандылық журналист Айнұр Балакешова марқұм кенші Сергей Киселевтің туыстарына сілтеме жасап хабарлады. Сергей Киселев Костенко шахтасындағы апаттан қаза тапқан кеншілердің соңғысы болды.

«Әкеміздің денесі ең соңғысы болып табылды. Ол 35 жылдан астам кенші болып жұмыс істеген еді», - дейді Сергей Киселевтің балалары.

Соңғы кеншіні іздеу жұмысы түні бойы жүргізілген. Төтенше жағдайлар министрлігі мен Қарағанды ​​облысы әкімдігінің баспасөз қызметтері қаза тапқан соңғы кеншінің табылғаны туралы ресми хабарлама жариялаған жоқ.

Бұған дейін Костенко шахтасында қаза тапқан 45 кеншінің мәйіті табылған болатын.

Еске салайық, Қарағанды ​​облысындағы Костенко шахтасында 28 қазанға қараған түні сағат 02:33-те аса қайғылы оқиға болды. Жарылыс кезінде шахтада 252 адам болған, оның 206-сы жер бетіне аман-есен шығарылды, қалғандары жер астында қалған болатын. Оларды іздеу жұмыстары тәулік бойы жүргізілді.

Жарылыстың қатты боланы соншалық, қаза тапқан кеншілердің басым көбін тану мүмкін болмаған.  

Қарағанды, Абай және Шахтинск қалаларындағы ауруханалардың жедел жәрдем бөліміне барлығы 28 адам жеткізіліп, 24 зардап шегуші ауруханаға жатқызылды.

Қарағанды ​​кеншілерінің қазасына байланысты 29 қазан Қазақстанда жалпыұлттық аза тұту күні болып жарияланды.