Қазақстан зілзаладан зардап шеккен Ауғанстанға гуманитарлық көмек жіберді
Дәрі-дәрмек пен шатырлар Ұлттық гвардия ұшағымен жіберілді.
Қазақстан жер сілкінісінен зардап шеккен Ауғанстанға гуманитарлық жүк жіберді, деп хабарлайды Azattyq Ruhy.
Қазақстан Президенті Қасым-Жомарт Тоқаевтың тапсырмасына сәйкес Ауғанстанға қолдау көрсету үшін мемлекеттік материалдық резервтен азық-түлік, шатырлар, киім-кешек және төсек-орын жабдықтары бөлінді.
"Жөнелтілетін гуманитарлық жүктің тізбесінде барлығы 1659 тонна көлемінде 13 тауар бар", - делінген ТЖМ хабарламасында.
Дәрі-дәрмектер мен шатырлар Ұлттық гвардия ұшағымен жіберілді.
Бұған дейін Төтенше жағдайлар министрлігінің құтқарушылары жер сілкінісі салдарын жоюға көмек көрсету үшін Ауғанстанға жіберілгенін хабарлаған болатынбыз.
Еске салайық, 7 қазанда Ауғанстанда алапат жер сілкінісі болып, 3 мыңға жуық адам қаза тапқан болатын.
