Өскеменде қазақи рухты муралдар пайда болды

Соңғы кездері Өскеменнің сұрқай да сұрғылт түсі еңсені басып тұратын көпқабатты үйлерінде көше суретшілерінің кесек-кесек туындылары бірінен соң бірі пайда болып, жұртты тәнті ете бастады. Жай ғана көзге көрінер әдемілік емес, патриоттық ерекше рух та сыйлайды, деп хабарлайды Azattyq Rýhy.

Мәселен, қала әкімдігі қайраткер Әлихан Бөкейханның тұлғасына, ел тарихына құрмет ретінде Әлихан Бөкейхан бейнесін Өскемендегі көп қабатты үйлердің біріне көркем мурал түрінде салу бастамасын жүзеге асырды. Муралда «Ұлтына, жұртына қызмет ету білімнен емес, мінезден!» деген Әлихан Бөкейханның өз сөзі қоса басылып, жазылған. Бұл мурал – Өскемен халқы үшін ерекше феномен болды, себебі ұлт көсеміне арналған қаладағы ең алғашқы композиция.

Одан бөлек, «Бәрі жақсы болады» деп әткеншек теуіп отырған үкілі бөрікті қазақ қызы да қазір жаңа ауданның ажарын айшықтап, үйлердің бірін әсемдеп тұр. Оның да астары жоқ емес. Жаңа мурал Балалар ауруханасына қарайды. Ауырып жатқан бүлдіршіндерге демеу болып, әлдебір күш беретіндей.

Айтып өтейік, соңғы апталарда Өскемен қаласында 5 бірдей мурал бірінен соң бірі пайда болды. Жаңа өнер нысандары өте қысқа мерзімде жасалған. Tigrohaud crew шығармашылық тобының суретшілері Ержан Танаев пен Али Закирге 10 күн ғана қажет болды. Шілденің шіліңгір ыстығына қарамастан екі суретші күн сайын муралмен жұмыс істеді.

Нәтижесінде «Бала хоккейші», «Жалау ұстаған ұл», «Өскемен», «Бәрі жақсы болады» тақырыптарындағы және Ұлт көсемі – Әлихан Бөкейхан кескінділген мұрал көпқабатты үйдің қаптал қабырғасына тұтас салынды.

«Өскемендегі үйлердің қабырғасына бес бірдей мағыналы сурет салдырдық. Оның көрген көзге әдемілік сыйлайтыны бір бөлек те, патриоттық салмағы бір бөлек. Ең бастысы қала тұрғындарына ұнап жатқанын байқап отырмыз. Бесінші сурет - Әлихан Бөкейхан Өскемендегі жаңа үйлердің бірінің қабырғасында менмұндалап тұр. Алаш көсемінің үлкен портреті жастарға рух беретініне күмәніміз жоқ. Суреттерді мөлдіретіп салған өнерлі жігіттерге үлкен респект», - дейді Өскемен әкімі Жақсылық Омар.

Ал суретшілердің айтуынша, муралға әдейі көлеңке көп түсетін қабырғалар таңдалды және суреттің бетіне лак жағылады, сондықтан ұзақ уақыт өңі кетпеуге тиіс деп жоспарланып отыр.

«Әр жұмыс өз кезегімен ұнап келе жатты. Ең бірінші «айпадпен» жобасын жасап аламыз. Одан кейін проектр қойылып, контурын түсіріп алғаннан кейін, күндіз бояуға кірісеміз. Дегенмен, оңай деп айта алмаймыз. Қиындығы да жетерлік. Жалпы бәрі сәтті шыққан сияқты. Өткен-кеткен тұрғындар туындыларға жоғары баға беріп, қолпаштап жатыр», - дейді суретші Али мен Ержан.

Айтпақшы, қала әкімі Жақсылық Омар әлеуметтік желіде «Қаланың тағы қай жеріне қандай сурет сұранып тұр?» деп тұрғындар арасына сауал да тастаған еді. Демек, қаланың ажарын аша түсетін мұндай композициялар әлі де көбейе түсетіні анық.