Елімізде сотталғандардың азаптауға қатысты шағымы жеті есеге азайған

Еліміздегі колонияларда бейнебақылау камераларының көптеп орнатылғанының арқасында сотталғандардың азаптау туралы шағымдарының саны 7 есеге азайды. Бұл туралы Алматыда өтіп жатқан азаптауға қарсы іс-қимыл жөніндегі халықаралық конференция барысында Бас прокурор Берік Асылов мәлімдеді, деп хабарлайды Azattyq Ruhy.

Бас прокурор қадағалау органдарында заманауи IT-технологияларын белсенді қолдануын атап өтті.

«52 колонияда «көрінбейтін аймақтарды» үздіксіз бейнебақылаумен қамту жүйесі енгізілді. Бүгінде прокурорлар онлайн режимінде өз кабинеттерінен бейнекамераларды көре алады. Бұл жұмыс оң нәтижесін көрсетуде.Себебі биыл, сотталғандардың азаптау туралы шағымдарының саны 7 есе азайды (36-дан 5-ке дейін)», - деді Берік Асылов.

Оның айтуынша, республиканың полиция органдарында барлығы 22 мыңнан астам бейнекамера жұмыс істеп тұр.

«ІІМ-мен бірге «көрінбейтін аймақтарды» азайту бойынша жұмысты жалғастырудамыз. Бүгінгі күнге қылмыстық істердің 94%-ы электрондық форматта тергелуде. Оның ерекшелігі – судья, прокурор және адвокатқа құжаттар ашық түрде көрінеді. Бұл қысым мен бұрмалаудың алғышарттары мен мүмкіндіктерін төмендетеді. Сонымен қатар биыл азаптау бойынша шағымдар мен қылмыстық істер туралы мәліметтерді автоматты түрде талдайтын жүйе іске қосылды. Ол тергеу органдарының ең нашар жағдайдағы бөлімшелерін анықтауға мүмкіндік береді», - деді ол.