«Самұрық-Қазына» қамқорлығымен Жаңаөзен жастары кәсіби білім алуда

«Samruk-Kazyna Trust» әлеуметтік жобаларды дамыту қоры арқылы қаржылай қолдау тапқан «Жарқын Болашақ» жобасындағы 177 жасөспірімнің басым бөлігі, яғни 161-і колледждерде орта арнаулы кәсіби білім алуда. Қалған 16 оқушы мектеп қабырғасында оқуға ден қойған, деп хабарлайды Azattyq Ruhy.

Осылайша 12-22 жас аралығындағы жаңаөзендік өскелең ұрпақ өкілі «Самұрық-Қазына» компаниялар тобының қамқорлығының арқасында елдің 9 өңіріндегі 45 жетекші білім беру ұйымына түсіп отыр.

«Бізге үкіметтік емес ұйымдар тарапынан көптеген өтінімдер түскенімен, олардың ішінен нағыз халыққа пайдалы, өзекті әрі әлеуметтік маңызға ие жобаларды таңдап, Қамқоршылық кеңес мүшелерінің назарына ұсынамыз. Оған дәлел, ағымдағы жылдың 1-тоқсанында 64 өтінім келіп түскенмен, нақты мақұлданған жобалардың саны жетеуді құрады. Еліміздің бірқатар озық оқу орындарында алаңсыз оқуына жағдай жасалған жаңаөзендік балалар да жақсы оқып, сұранысқа сай мамандықтарды игеретініне сенеміз. Себебі, бір ғана 250 мыңнан астам адам еңбек ететін «Самұрық-Қазына» компанияларында мұнай саласынан бөлек, ел экономикасындағы үлесі зор көлік-логистика, химия және атом өнеркәсібі, тау-кен кешені, энергетика және жылжымайтын мүлік, тағы басқа салалар бар», - деп атап өтті «Samruk-Kazyna Trust» әлеуметтік жобаларды дамыту қорының бас директоры Альфия Адиева.

Жалпы сомасы 300 млн теңгеге жуықтайтын жоба бойынша 49 қатысушы техникалық, 10 қатысушы - педагогикалық, 46 қатысушы - ақпараттық технологиялар, 12 қатысушы - экономика және бизнес, 10 қатысушы - спорт, 11 қатысушы - өнер, 4 қатысушы - медицина, 25 қатысушы - гуманитарлық бағыттарда, 10 қатысушы - Республикалық физика-математика мектебінде білім алып жатыр.

«2022-2023 оқу жылының бірінші жартысының қорытындысына сәйкес, жоба аясында колледжде оқитын 161 студенттің барлығы қорытынды емтиханнан сәтті өтті. 161 студенттің 12-і 1-семестрді «Өте жақсы» (GPA 3,67 - 4,0), 121-і «Жақсы» (GPA 2,67 - 3,33) және 28-і «Қанағаттанарлық» (GPA 1,0 - 2,33) деген нәтижемен аяқтады. Мектептегі 16 оқушының 8-і - «Жақсы» және 8-і - «Қанағаттанарлық» деген қорытынды нәтиже көрсетті», - деп хабарлайды жоба операторы.

Мәліметке жүгінсек, үлгерімі төмен қатысушылардың көрсеткіштерін жақсарту мақсатында білім беру ұйымдарымен келіссөздер жүргізіліп, қосымша сабақтар ұйымдастырылған. Сонымен қатар, жоба қатысушыларының жан-жақты дамуын қолдау мақсатында тимбилдингтер, «Қаржылық сауаттылық» тақырыбында семинар-тренинг, «Білімнің маңыздылығы» тақырыбында спикерлермен кездесулер және жобаның инстаграм парақшасында әртүрлі бағытта байқаулар қолға алынған.

Сонымен қатар, «Жарқын болашақ» жобасының қатысушылары қоғамдық, зияткерлік және спорттық бағыттар бойынша түрлі іс-шараларға белсенді қатысып, жеңімпаз атануда. Оқу жылының басынан бастап 41 жоба қатысушысы түрлі республикалық, қалалық және колледжішілік сайыстарда топ жарып келеді.

«Ата-аналар тарапынан толық ризашылықты байқаймыз. Өйткені Жаңаөзеннің балаларының жаңа мамандықтарды игеріп, болашағын көркейтуге толық мүмкіндігі бар», - дейді «Bilim Foundation» корпоративтік қорының жетекшісі Ерлан Айтмұханбет.

Бүгінде, бұдан бөлек, жаңаөзендік 50 оныншы сынып оқушысы «Самұрық-Қазына» АҚ компаниялар тобы атынан «Samruk-Kazyna Trust» қорының қолдауымен Бурабай баурайындағы үздік «IQanat High «School of Burabay» мектеп-пансионатында 2023-2024 жылдарға оқуын жалғастырып, қазақстандық және шетелдік жоғарғы білім орындарына түсуге дайындалуда. Бұл жерде де құны 300 миллион теңгені құраған жоба аясында гранттар оқуға, жол жүруге және қажетті мектеп киімін алуға байланысты шығындарды жабады.

Еске сала кетсек, Мемлекет басшысы Қасым-Жомарт Тоқаев әлеуметтік-экономикалық даму мәселелері жөнінде кеңейтілген кеңес барысында Жаңаөзендегі ахуалға тоқтала келе, аймақ жастарының мұнай саласынан басқа да кәсіптерді игеруі қажеттігін нұсқады.