Партиялардың сайлау бюллетенінде орналасу тәртібі белгілі болды

Орталық сайлау комиссиясы Мәжіліс пен мәслихат депутаттығына кандидаттарды партиялық тізімдер бойынша тіркеуді аяқтады, деп хабарлайды Azattyq Rýhy Zakon.kz-ке сілтеме жасап.

Бүгін Орталық сайлау комиссиясының кезекті отырысында жеребе тартылды, әр партияның өкілі бюллетеньдегі реттік нөмірін таңдады. 

Парламент Мәжілісі депутаттарын сайлаудағы бюллетеньге партиялар осы тәртіппен енгізіледі:

1. Amanat партиясы;

2. «Ауыл» партиясы;

3. Respublica партиясы;

4. Қазақстан Халық партиясы;

5. «Байтақ» партиясы;

6. «Ақ жол» партиясы;

7. Жалпыұлттық социал-демократиялық партия.

Айта кетейік, Мәжіліс депутаттығына Қазақстанда ресми тіркелген барлық 7 партия кандидаттарын ұсынды.

69 депутаттық мандатқа 281 адам үмітті. Олардың орташа жасы - 45,7 жас.

Үміткерлердің ең үлкені 1942 жылы, ең кішісі 1997 жылы туған. Партия тізімінде 201 ер, 80 әйел бар.

Бір мандатты округтер бойынша кандидаттарды тіркеу 18 ақпанда сағат 18:00-ге дейін жалғасады.