Орталық сайлау комиссиясы «Ақ жол» партиясының тізімін тіркеді

6 ақпанда «Ақ жол» Қазақстан демократиялық партиясы Орталық сайлау комиссиясына Парламент Мәжілісі депутаттарын сайлауға партиялық тізімді ұсыну туралы құжаттар тапсырды, деп хабарлайды Azattyq Ruhy.

Осыған байланысты Орталық сайлау комиссиясы кандидаттардың Конституция мен сайлау туралы Конституциялық заң талаптарына сәйкестігін айқындау жөнінде тиісті рәсімдер жүргізді.

Осы мәселе бойынша Орталық сайлау комиссиясының мүшесі Асылбек Смағұлов баяндама жасады. Ол «Ақ жол» 54 адамнан тұратын партиялық тізімді ұсынғанын хабарлады. Тізімдегі 18 адам – әйелдер, жастар және мүгедектігі бар адамдар, бұл жалпы санының 33,3% құрайды. Партиялық тізімге енгізілген барлық адам заң талаптарына сәйкес келеді.

Сондай-ақ Асылбек Смағұлов 2021 жылғы қаңтарда өткен Парламент Мәжілісі депутаттарының сайлауында «Ақ жол» ҚДП сайлаушылардың 10,95% дауысын алғанын хабарлады. Осыған байланысты партия сайлау жарнасын төлеуден босатылады.

Кандидаттардың сәйкестігін айқындау және партиялық тізімді тіркеу туралы хаттамаларға қол қойылғаннан кейін ОСК мүшелері «2023 жылғы 19 наурызға тағайындалған Қазақстан Республикасы Парламенті Мәжілісі депутаттарының кезектен тыс сайлауында «Ақ жол» Қазақстан демократиялық партиясы» қоғамдық бірлестігінің партиялық тізімін тіркеу туралы» қаулы қабылдады.

Естеріңізге сала кетейік, 19 қаңтарда Президент жетінші шақырылымдағы Мәжілісті тарату және депутаттардың кезектен тыс сайлауын тағайындау туралы Жарлыққа қол қойды, сондай-ақ барлық деңгейдегі мәслихаттардың өкілеттігін мерзімінен бұрын тоқтату туралы қаулы шығарды. Мәжіліс пен мәслихаттар депутаттарының кезектен тыс сайлауы 2023 жылғы 19 наурызда – бір күнде өтеді.