Бразилияның экс-президенті АҚШ-тың туристік визасына өтініш берді

Бразилияның бұрынғы президенті Жаир Болсонару АҚШ-қа алты айлық туристік виза алуға өтініш берді. Бұл туралы оның адвокаты ВВС ақпараттық агенттігіне айтты, деп хабарлайды Azattyq Ruhy.

Болсонару 30 желтоқсаннан бастап АҚШ-та тұрып жатыр. Бастапқыда ол Флоридаға дипломаттар мен мемлекет басшыларына арналған, мерзімі 30 күндік A-1 визасымен барған.

Енді Болсонару АҚШ-та қалуды жоспарлап отыр, әзірге иммиграция қызметкерлері өтінішті қарау үсітнде. Болсонарудың адвокаты айтқандай, экс-президент өмірінің 34 жылын мемлекеттік қызметке арнады және біраз демалғысы келеді.

«Бұрынғы президент өзін ретке келтіріп, алдағы уақытта немен айналысатынын шешпес бұрын бірнеше ай бойы АҚШ-та турист ретінде демалып алуды жөн көреді», - деді AG immigration заң компаниясының өкілі.

Оның айтуынша, АҚШ билігі Болсонарудан өткен жұмада B1/B2 санатындағы туристік визаға өтініш алған.

Айта кетсек, Болсонару сайлауда жеңілгеннен кейін АҚШ-қа кетті және 1 қаңтарда Бразилияның жаңа президенті Луис Инасио Лула да Силваның инаугурациясына қатысқан жоқ.

8 қаңтарда бұрынғы президенттің мыңдаған жақтастары федералды мекемелерге шабуыл жасады, олар Бразилияның президент сарайына, конгресіне және Жоғарғы сотына басып кірді.

Болсонарудың өзі болған оқиғағаға қатысты өкінішін білдірді, бірақ оның тәртіпсіздіктерге ешқандай қатысы жоқ екенін мәлімдеді.

10 қаңтарда Болсонару Флоридада ауруханаға түскені белгілі болды. Оған оның 2018 жылы шабуылдан алған жарақаты себеп болған. Келесі күні экс-президент операция жасау үшін Бразилияға оралуы мүмкін деп хабарланды. Флоридада Болсонару бразилиялық аралас жекпе-жек балуаны Жосе Алдудың үйінде тоқтаған еді.