Қытайдың Сычуань провинциясында бала тууға қатысты шектеулер алынып тасталды

Қытайдың Сычуань провинциясының билігі әр отбасына рұқсат етілген балалар санына шектеулерді алып тастады. Бұл – елдегі туу деңгейінің төмендеуімен күресуге бағытталған тағы бір шара, деп хабарлайды Azattyq Ruhy агенттігі BBC Russian-ге сілтеме жасап.

Сонымен қатар, провинция Үкіметі «бұдан былай некесіз бала көтерген әйелдер оны ресми түрде тіркей алады және ерлі-зайыптылар сияқты барлық жеңілдікті ала алады» деп шешті.

Қытай заңы ресми тұрмысқа шықпаған әйелдерге бала тууға тыйым салмайды, бірақ заң бойынша «ана» статусы тек некедегі әйелге беріледі. Сонымен қатар жалғызбасты аналарға, тұрмыстағы әйелдерге берілетін жеңілдіктер қолданылмайды, тіпті жұмыс беруші оларды кез келген уақытта жұмыстан шығара алады.

Бұдан былай Сычуань провинциясында кез келген тұрмысқа шықпаған әйел, егер ол бала көтергісі келсе, медициналық көмекке, мектептегі орынға және ақшалай төлемдерге үміт арта алады.

Қытай билігі бірнеше жыл бойы «Бір отбасы - бір бала» саясатынан туындаған жағымсыз демографиялық тенденцияны өзгертуге тырысып келеді. Айта кетерлігі мұндай саяси жүйе 1980 жылдың қыркүйегінде ел халқының бақылаусыз өсуін азайту мақсатында енгізілді. Өткен жылы Қытай халқы 60 жылда алғаш рет азайды. Бұған дейінгі халықтың азаюы Мао Цзэдунның «үлкен секіріс» деп аталатын экономикалық экспериментіне байланысты болды, бұл кең таралған аштық пен өлім-жітімнің жоғарылауына әкелді.

2023 жылдың 23 қаңтарында Қытай үкіметі статистиканы жариялады, оған сәйкес 2022 жылы Қытайда 9,56 миллион адам дүниеге келді, ал 10,41 миллион адам қайтыс болды.

Туу көрсеткішінің азаюының тағы бір себебі - көптеген қала тұрғыны некеге тұруды және балалы болуды кейінге қалдырады. Қытайдың ұлттық статистика бюросының басшысы Кан Йидің айтуынша, мұның соңы көп адамның балалы болғысы келмейтініне, некеге тұру мен жүктілікті кешіктіруге және елде бала туу жасындағы әйелдердің азаюыны әкеп соқты.