Семейде ойын-сауық орталығы мен қонақ үй салынып, аспалы көпір қайта жаңғыртылады

Үкімет отырысында Абай облысының әкімі Нұрлан Ұранхаев облысты дамыту туралы айтты, деп хабарлайды Azattyq Ruhy.

“Туризм саласында 41 млрд теңгеге 6 іс-шараны іске асыру, оның ішінде сауда ойын-сауық орталықтары (Семей қаласында – 3,7 млрд. теңге), қонақ үй кешені (Семей қаласында – 24 млрд. теңге) және Алакөл көлінің жағалауындағы демалыс базасын салу (6,1 млрд. теңге)”,- деді ол.

Ол атағандай, халықаралық көлік дәліздерінің байланыстырушы буындарын ашу және облысымыздың транзиттік-көлік инфрақұрылымын дамыту үшін кешенді жоспарға 137,8 млрд теңгеге 9 іс-шара енгізілген.

«Аягөз-Бақты-Қытай шекарасы» учаскесінде теміржол салу, құрғақ порт пен логистикалық парк құру, Ертіс өзені арқылы өтетін автогуж көпірін, Семей қаласындағы аспалы көпірді қайта жаңарту, 2 мың шақырымға жуық автожолдарды жөндеу. Осылайша, жақсы және қанағаттанарлық жағдайдағы жолдардың үлесі 82%-дан 98%- ға дейін артады»,- деді ол.