Португалиялықтар қымбатшылық салдарынан азық-түлікті Испаниядан ала бастады

Испанияда бағаның күрт өсуіне байланысты негізгі азық-түлікке салынатын ҚҚС-ты алып тастау туралы шешімнен кейін Португалия тұрғындарының басым бөлігі көрші елдің супермаркеттерінде сауда жасай бастады, деп хабарлайды Azattyq Ruhy.

«Кейбір тауар біздікінен әлдеқайда арзан. Португалияда мемлекеттің көмегіне қарамастан, тауарлар құны өзгеріссіз қалды», - дейді Испания шекарасынан бірнеше шақырым жерде орналасқан Шавиш қаласының тұрғыны Вероника Гарсия.

Көрші елден азық-түлік сатып алу арқылы әйелдің бес адамнан тұратын отбасы айына шамамен 200-300 еуро үнемдейді екен.

Испанияда бірінші қаңтардан бастап алты айға дейін нан, сүт, ірімшік, жұмыртқа, жемістер, көкөністер мен жармаларға қосылған құн салығы алынып тасталды, зәйтүн майы мен макаронға ҚҚС төмендетілді.

Еуростаттың мәліметі бойынша, Испанияда желтоқсан айында Еуроаймақтағы жылдық ең төменгі инфляция – небәрі 5,5% тіркелді. Португалияда желтоқсан айында баға 9,8%-ға өсті.

Еуроаймақтағы ең жоғары инфляция Балтық елдерінде: Латвияда (20,7%), Литвада (20%) және Эстонияда (17,5%) болды.