Жалған шот-фактуралар жазып, мемлекетке аса ірі мөлшерде залал келтіргендер сотталды

Астана қаласы Сарыарқа ауданының №2 аудандық соты 10 адамға қатысты айыптау үкімін шығарды. Олар 4 жыл бойы шот-фактураларды жазып берумен айналысқан, деп хабарлайды Azattyq Ruhy.

Бұған қоса сотталушыларға қылмыстық топ құру және оған басшылық ету, қылмыстық жолмен алынған ақшаны заңдастыру бойынша айып тағылды.

Астана қалалық сотының мәлімдеуінше, 2018-2021 жылдары өздерінің бақылауындағы 20 кәсіпорынның атынан шот- фактураларды жазып, мемлекетке контрагент-кәсіпорындар салық түрінде төлемеген 13 млрд. 449,8 млн. теңге сомасында аса ірі залал келтірді.

Ұйымдасқан қылмыстық топтың қатысушылары кәсіпорындарды сатып алып, тіркеген. Кейін осы кәсіпорындар арқылы жалған шот-фактуралар жазған әрі осындай қызметтерді қажет ететін контрагенттерді іздеген.

«Сотталушылар кінәларын толық мойындамады. Алайда, олардың кінәсі куәлердің айғақтарымен, жасырын тергеу әрекеттерінің нәтижелерімен, сот-экономика сараптамасының қорытындысымен, Мемлекеттік кіріс департаментінің мамандарының қорытындыларымен және істің басқа да материалдарымен дәлелденді», - деп көрсетті Астана қалалық сотының баспасөз қызметі.

Сот үкімімен ұйымдасқан қылмыстық топтың басшылары 7 жыл 6 ай және 8 жылға, ал қылмыстық топқа қатысушылар 6 жылдан - 6 жыл 8 айға дейін бас бостандығынан айырылды.

Барлық сотталған адамдарға меншік құқығына қарамастан ұйымдарда басшы лауазымдарды атқару құқығынан айыру, оның ішінде шот-фактураларды жазып беруге байланысты лауазымдарды атқару құқығынан 10 жыл мерзімге айыру түрінде қосымша жаза тағайындалды.

«Мүлікті тәркілеу қылмыстық жолмен алынған мүлікке қатысты қолданылды. Атап айтқанда, 123 млн. теңгеден астам сомаға ақшалай қаражат, жеке үйлер, пәтерлер, жер учаскелері түріндегі бірқатар жылжымайтын мүлік, сондай-ақ сотталған адамдар мен үшінші тұлғалардың меншігіндегі 2 автомобиль мемлекет кірісіне тәркіленді», - делінген соттың хабарламасында.

Үкім заңды күшіне енген жоқ.