Beeline-ның ресейлік телеарналар көрсетілімін тоқтату туралы шешімі: министр пікір білдірді

Beeline компаниясы 5 қазаннан бастап «Үйдегі теледидар интернеті» пакеті аясында Қазақстандағы 15 ресейлік телеарнаның көрсетілімін тоқтататынын мәлімдеді. Ақпарат және қоғамдық даму министрі Дархан Қыдырәлі аталған мәселеге қатысты пікір білдіріп, бұл шешімнің қалай қабылданғанын айтты,  деп хабарлайды Azattyq Ruhy.

Министрдің айтуынша, компанияның мәлімдемесі 28 қыркүйекте шыққан. Сондай-ақ компания бұл шешімді еш ведомствоның ықпалынсыз, өздігінше қабылдаған.

Айта кетерлігі, Beeline - Голландияда орналасқан жеке компания.

«Компания экономикалық ахуалға, аудиторияға, жарнамаға қарайды, мүмкін басқа да себептер бар шығар. Бірақ менің ойымша, бұл шешімнің еш саяси негізі жоқ. Ол – жеке компания», – деп жауап берді Дархан Қыдырәлі Мәжіліс отырысынан кейін тілшілер сауалына.

Министр сондай-ақ, бұған дейін қазақстандықтардың елдегі ресейлік БАҚ жұмысын тоқтатуды сұраған өтінішіне орай қандай да бір шара қолданыла ма деп сұраққа жауап берді. 

«Қазақстандық заңнаманы бұзу деректері анықталса, шара қолданылады. Бірақ әзірге бұл мәселе бойынша министрлікке ұсыныс түскен жоқ», - деп жауап берді ведомство басшысы.