Таразда көпірдің астынан граната мен 3 тапанша табылды

Тараздағы көпірдің астынан пакетке салынған қару-жарақтар табылды,  деп хабарлайды Azattyq Ruhy.

«31 тамызда Жамбыл облысы Полиция департаментінің Экстремизмге қарсы іс-қимыл басқармасының қызметкерлері жаппай тәртіпсіздік барысында ұрланған қарудың тұрған жерін анықтау бойынша жедел-іздестіру іс-шараларын жүргізу кезінде Тараз қаласының көпірлерінің бірінің астынан қару-жарақ пен оқ-дәрілер салынған орынды тапты», - деп хабарлады Жамбыл облыстық Полиция департаменті.

Қара түсті полиэтилен пакеттен МР-79-9 травматикалық тапаншасы, маркасы белгісіз 2 тапанша, көзден жас ағызатын 1 граната, 5,45 мм калибрлі 22 патрон, 9 мм калибрлі 27 патрон, 12 калибрлі 5 патрон және Макаров тапаншасының оқжатары тәркіленді.