Ауыл тұрғынын азаптаған Сауран ауданының полиция қызметкерлері қамауға алынды

Сауран ауданының тұрғынына пакет кигізіп, әбден азаптаған полиция қызметкерлері уақытша қамауға алынды. Бұл туралы Azattyq Ruhy Түркістан телеарнасына сілтеме жасап хабарлайды.

4 бірдей лауазымды тұлғаға Түркістан қаласының мамандандырылған тергеу соты 2 ай мерзімге күзетпен ұстау бұлтартпау шарасын санкциялады.

Айта кетейік, биылғы жылдың басында қос бірдей азамат тәртіп сақшыларынан жәбір көрдік деп шағымданған болатын.

Оқиға полиция бөлімінің бейнебақылау камерасына түсіп қалған. Жазбаға сот сараптамасы тағайындалып, адамның жан айқайына ұқсас дыбыс жәбірленушінің дауысы екені анықталып отыр. Сондай-ақ күдіктілерді балағаттап, қоқан-лоққы көрсеткен полицейлердің дауысы екені де расталған.

Айта кетейік, уақытша қамауға алынған Сауран ауданының полиция бөлімінің қызметкерлері мен туыстары жәбірленушілерге қаржы ұсынып, арыздан бас тартуға үгіттеген.

«Бұл азаматтардың қылмысы дәлелденген жағдайда лауазымынан шеттету және 3 жылдан 7 жылға дейін бас бостандығынан айыру жазасы көзделген», - деді Түркістан қаласы мамандандырылған сотының судьясы Әкімбек Жанасов.