Қазақстанда пайдалы қазбалар бойынша аукцион электрондық форматта өтетін болады

Қазақстанда уранды қоса есептемегенде, қатты пайдалы қазбалар бойынша аукциондар электрондық түрде өткізілетін болады, деп хабарлайды Azattyq Ruhy.

Бұл тетік рәсімдерді оңтайландыруға және ашық етуге, сондай-ақ бизнес үшін де, мемлекет үшін де шығындарды айтарлықтай қысқартуға мүмкіндік береді.

Аукционды өткізуді электрондық форматқа ауыстыру үшін ҚР Индустрия және инфрақұрылымдық даму министрлігі «Пайдалы қатты қазбаларды барлау немесе өндіру жөніндегі операцияларды жүргізу үшін жер қойнауы учаскелері бойынша аукцион өткізу қағидаларын бекіту туралы» және «Бірдей басымдығы бар өтініш берушілер арасында аукцион өткізу қағидаларын бекіту туралы» бұйрықтарға тиісті өзгертулер енгізген. Бүгінде бұйрықтар мүдделі мемлекеттік органдармен келісу рәсімдерінен өтуде.

«Айта кетерлігі, жаңа редакциядағы бұйрықтар бірыңғай оператор туралы мәліметтермен толықтырылды. Осылайша, аукциондарға қатысу үшін кепілдік жарнаның талапқа енгізілуі процеске қатысушылардың аукцион рәсімдерін теріс пайдалануы мен түрлі айла-шарғыларды болдырмауға мүмкіндік береді», - делінген ведомствоның хабарламасында.