Авиация әкімшілігі Орал әуежайында ұшақтардың ұшуына шектеу қоймаған

«Қазақстанның авиациялық әкімшілігі» АҚ Орал қаласының әуежайында әуе кемелерінің ұшуын шектемегенін мәлімдеді, деп хабарлайды Azattyq Ruhy.

ҚР Индустрия және инфрақұрылымдық даму министрлігінің Азаматтық авиация комитеті хабарлағандай, шешімді авиатасымалдаушылар өздігінен қабылдаған.

«Әкімшіліктің авиациялық инспекторлары жүргізген тексеру барысында әуеайлақты пайдаланушы барлық авиатасымалдаушылар үшін аэронавигациялық ақпарат жинағында тұрақты негізде жариялаған рульдеу жолағы мен перронның жасанды төсемдерінің төмен көтергіштік қабілетіне қарамастан, әуе кемелерінің кейбір үлгілерінде Орал әуеайлағына ұшу қарқындылығы мен ұшу жүктемесінің артуы анықталды. Бұл көрсеткіш рұқсат етілгеннен едәуір артық. Авиациялық әкімшілік тарапынан әуеайлақты пайдаланушыға әуе жолағының бұзылуын және әуе кемелерінің бүлінуін болдырмау үшін жасанды төсемдерге рұқсат етілген жүктемелердің сақталуын бақылауды қамтамасыз етуге инспекторлық нұсқама жіберілді», - делінген хабарламада.

Бұдан басқа, авиакомпаниялар өкілдерімен және әуеайлақты пайдаланушымен өткізілген кездесулер мен талқылаулардан кейін Орал әуежайына ұшуды орындауды жалғастыруға, жасанды төсемге жүктемені азайтуға және әуеайлақта әуе кемелерін пайдалану кезінде ұшу қауіпсіздігінің тиісті деңгейін сақтауға мүмкіндік беретін шараларды әзірлеу туралы шешімдер қабылданды.

Айта кетейік, бұған дейін Air Astana әуе компаниясының баспасөз қызметі 2022 жылдың 1 тамызынан бастап Оралға рейстер Embraer лайнері арқылы орындалатынын хабарлаған болатын. Air Astana борттың ауыстырылуы Орал әуежайының такси жолы мен перронның жасанды беттеріне түсетін жүктемені шектеу қажеттілігімен түсіндірілді.

Өз кезегінде FlyAryastan әуе компаниясы 2022 жылдың 1 тамызынан бастап Оралға рейстерді тоқтатады. Әуе тасымалдаушысының баспасөз қызметінен хабарланғандай, «өзгерістер Орал әуежайының жасанды төсемдегі жүктерге қойылатын талаптардың сақталуын қамтамасыз ету туралы өтінішіне байланысты қабылданады».